Joh 14 | HUI | STEP | Yasuhanda ti lamialu lalu, Tí mini tumutumu bu dara dege dindi ho nahalimu. Ngode Datagaliwabehondo mini mbiraore wialu kamidagua i̱hondobi mini mbiraore wialu halimu.

a 14.1Yo 14.27, 16.33

b 14.2Yo 13.33, 13.36

c 14.3Yo 12.26, 17.24, Ab 1.11, 1Te 4.17

d 14.6Yo 1.4, 1.17, 8.19, 8.32, 10.9, 11.25, Lm 5.1-2, Hi 9.8, 10.20

e 14.7Yo 8.19

f 14.9Yo 12.45, Kl 1.15, Hi 1.3

g 14.10Yo 7.16, 8.28, 10.38, 12.49, 14.24, 17.21-23

h 14.11Yo 5.36, 10.38, 14.20

i 14.12Md 21.21, Mg 16.16-20, Lg 10.17

j 14.13Md 7.7, Lg 11.9, Yo 15.7, 15.16, Ya 1.5, 1Yo 3.22

k 14.15Yo 14.21-23, 15.10, 15.14, 1Yo 5.3

l 14.16Yo 14.26, 15.26, 16.7,Lm 8.15, 8.26

m 14.17Md 10.20, Yo 16.13, Lm 8.26, 1Ko 2.14, 1Yo 2.27, 4.6

n 14.18Md 28.20, Yo 14.3, 14.28

o 14.19Yo 16.16, 1Ko 15.20

p 14.20Yo 10.38, 14.10, 17.21-26

q 14.21Yo 14.15, 14.23, 15.10, 16.27, 1Yo 2.5, 5.3

r 14.22Ab 10.41-42

s 14.23Md 18.20, Yo 14.15, 2Ko 6.16, Eb 3.17, 1Yo 2.24, Mo 3.20

t 14.24Yo 5.19, 5.38, 7.16, 12.49

u 14.26Lg 24.49, Yo 14.16, 15.26, 16.13, 1Yo 2.20, 2.27

v 14.27Yo 14.1, 16.33, Pb 4.7, Kl 3.15

w 14.28Lg 24.51, Yo 14.3, 14.12, 14.18, 16.28, 20.17, Pb 2.6

x 14.29Yo 13.19, 16.4

y 14.30Yo 12.31, 16.11, Eb 2.2

z 14.31Md 26.46, Yo 10.18, 12.49, Hi 5.8

John 14

Yasuhanda, Aba karia polenenaga hariga i̱ ko, lenego ogo

1 Yasuhanda ti lamialu lalu, Tí mini tumutumu bu dara dege dindi ho nahalimu. Ngode Datagaliwabehondo mini mbiraore wialu kamidagua i̱hondobi mini mbiraore wialu halimu. ^a 2 I̱ Abanaga andagani hobane dewa ka. Hobane dewa nakale tí holene mo manda manda bule poro ala langirugo nalangidole. ^b 3 Tí holene manda manda bu ngelalu i̱ kogoria ina mandagi haabo hami̱ya tí damu dai bule poro. ^c 4 I̱ pole kogo hariga ogoha polebira manda biai kami, lene.

5 Ani layago Tomasa hale howa ibuhondo lalu, Anduane Homogo-o í̠ ani pole kebe ina manda nabi kamago í̠ hariga ogoha polebere agua manda bibehebe, lene.

6 Ani layagola Yasuhanda ladai bialu ibuhondo lalu, Harigabi henene lolenebi holene gahengebi i̱ ko. Mbiralime Aba karia pole i̱ koria naibiyagua pobe nahe. ^d 7 Tígua i̱ manda bidamigo i̱ Ababi manda buleberami. Áyu ogoni howa ibu de handalu bayuwa manda bidami, lene. ^e

8 Ani layagola Pilibihanda ibuhondo lalu, Anduane Homogo-o í̠ Aba inahondo walia ha. Walia haregola karulape manda buleberama, lene.

9 Yasuhanda ibuhondo ladai bialu lalu, Pilibi-o i̱ tí heba luore haabo harimago howa í̠na i̱ manda nabi dege kebe. I̱ hendedagome i̱ Ababi hendeda. Ani biagane ngago í̠na Aba inahondo walia ha larigo irane agibe. ^f 10 Pilibi-o i̱ Abaha i̱ kogo i̱ha i̱ Aba kagobi manda bialu mini mbiraore nawi kebe, lalu Yasuhanda ibunaga talima piagaruhondo lalu, I̱na tíhondo bi langialu kogo i̱ninaga hongome ndo langialu ko. I̱ Aba i̱ha kago ibugua biabe bialu ka. ^g 11 I̱ Abaha i̱ kogo i̱ha i̱ Aba kagobi larogo hale howa mini mbiraore wilimu. Bi hale howa mini mbiraore nawi kamiyagua i̱na biabe bigi bialu kogoni hondowa mini mbiraore wilimu. ^h 12 I̱na tíhondo heneneore laro. I̱hondo mini mbiraore wialu kagome i̱na biabe bialu kodagua ibuguabi bulebira. I̱ Aba kagoria porogome ibugua biabe timbuni tarabi bulebira. ⁱ 13 Igini i̱na berogome Abanaga mini mo yaraga helo tígua i̱naga minini howa mbirale mbira bia larimiyagua i̱na biai holebero. ^j 14 Tígua i̱naga minini howa mbirale mbira bia larimiyagua i̱na biai holeberoore, lene.

I̱ Abahanda ibu Dinini tíhondo ngulebira, lenego ogo

15 Tígua i̱hondo gubalini ho kamiyagua i̱na bilimu lalu kodagua bialu holeberami. ^k 16 I̱na i̱ Abahondo lamialu lalu, Biamogo Biagane ibuni tí heba haabo helo i̱ pani mia, lolebero. ^l 17 Biamogo Biagane ogoni ibu Ngode Datagaliwabe kagobi heneneore lagane Dinini ka. Dinini ogoni dindi mana hangu biaga karume de nahandabehebi minime manda nabibehebi kago tigua ibu nayamibehe kagoni. Tígua dege ibu mandabu kami. Ibu tí heba haabo howa tíha holebirago mandabu kami. ^m

18 Tí hono wahene ale halimulo yu wahalu napolebero. Tí kamiria i̱ dai bulebero. ⁿ 19 Emene howa dindi mana hangu biaga karume i̱ de nahondolebira. Tígua dege i̱ de hondoleberami. I̱ kodagua tíbi holeberami. ^o 20 Horo ogoningi i̱ tíha kogobi i̱ Abaha i̱ kogobi i̱ha tí kamigobi manda biai holeberami. ^p

21 I̱na bilimu lalu kodagua mo yai halu bialu kagome i̱hondo gubalini ho ka. Mbirali i̱ gubalini ho kago i̱ Abahanda ibuhondobi gubalini ho holebira. I̱nabi ibuhondo gubalini howa i̱ni ibuhondo walia holebero, lene. ^q

22 Ani layago hale howa Yudasa Isagariodo ndo Yudasa mendeme ibuhondo lalu, Anduane Homogo-o inahondo í̠ni mo walia halu dindi mana hangu biagaruhondo í̠ni walia naholebero larigo irane agibe, lene. ^r

23 Ani layagola Yasuhanda ibuhondo ladai bialu lalu, Mbiralime i̱hondo gubalini ho kayagua i̱naga bi mana hale halu biai holebira. Ani bialu kago i̱ Abahanda ibuhondo gubalini holebira. Ani buwa ogoni ibu karia i̱bi i̱ Ababi iya ibuwa ibu heba haabo holeberaba. ^s 24 I̱hondo gubalini nahe karume i̱naga bi hale halu nabulebira. Tígua bi mana hale halu kamigo i̱naga bi mana ndo i̱ Aba i̱ pu layagonaga bi mana langirugoni. ^t

25 I̱ nape tí heba kogo howa bi ogoni langiru. 26 Maha Biamogo Biagane ibu Ngode Datagaliwabe Dinini kago i̱ Abahanda i̱ minini howa tí kamiria pu lolebirago ibugua ibuwa mbirale bibahende tíhondo lawai holebira. I̱na tíhondo langialu harugo damenego bibahende ibugua tí mo mitangi bia hai holebira. ^u

I̱naga mo palia holene tíhondo ngero, lenego ogo

27 I̱ pole howa mo palia holene tí kamigo heba ngelalu polebero. I̱ninaga mo palia holene tíhondo ngero. Dindi mana hangu biaganerume ngiagadagua ndo ngero. Tí mini tumutumu bu dara dege dindi hobi gi hobi nahalimu. ^v 28 I̱na tíhondo lalu i̱ Aba karia pialu tí kamiria dai bule larugo hale harimigoni. Hale howa i̱hondo gubalini ho kamile i̱ Aba karia porogonaga turu ho kamile. Irane i̱ Aba i̱ kogobi ndo ibu timbuniore kago. ^w 29 I̱na tíhondo langiai harugo ogoni nabi ngaore langiru. Ani langirudagua birago hondowa tígua i̱hondo mini mbiraore wilimulonaga langiai haru. ^x 30 I̱na tí heba bi lu lalu haabo habe nahego wali agali dindi bibahendeni karunaga haguane kago ibu i̱ koria ibulene kaware nga. Ibuwa i̱ha nakarulape mbira ngaria handa walia naholebira. ^y 31 Nde dindi mana hangu biagane karume i̱na i̱ Abahondo gubalini ho kogo ti manda bilonaga ibugua bibe laradagua hangu bialu ko. ^z

Ai mali̱ya heyadaba, lene.